town Kleck

2024-04-06 Zbigniew Wołocznik

Ино мы, выслухавшы листовъ князя Ѳедора Ярославича, продка нашого, зъ особливое ласки нашое, на его чоломбитъе то вычнили: на то дали ему сесь нашъ листъ и тое все то потвержаемъ симъ нашымъ листомъ на вечность ему самому и его жоне и ихъ детямъ и на потомъ будучымъ и ихъ щадкомъ со всими съ тыми людьм и вышейписаным и зъ ихъ всими землями пашными и бортными, и съ сеножатмй, и зъ лесы, зъ дубровами, и зъ ловы зверынными и пташыми, и съ озеры, и зъ реками, и съ ставы и ставйщы, и зъ бобровыми гоны, и зъ службами, и входы всими тыхъ людей и дворыщъ, и зъ даньми грошовыми и медовымй й бобровыми и куничными, и дяклы и ржаными и овсяными, и со всими иншыми платы и доходы и пожытки тыхъ людей и земель и дворыщъ и со всемъ съ тымъ,
какъ ся тые люди и земли и места й дворыща, й огородъ здавна въ собе мели, и они маютъ подле данины и листовъ и князя Ивана и сына его князя Ѳедора Ярославичовъ, предковъ нашыхъ, которые листы даны ему передъ пятьминадцатьми леты. Воленъ онъ тамъ прыбавити и розшырыти и ку своему лепшому и пожиточнейшому обернути, какъ самъ налепей розумеючы, кромъ обряженья правъ нашыхъ и потомковъ нашыхъ, звычаевъ старыхъ князства нашего Литовского, которые жъ заховываемъ въ целости. А маеть онъ намъ и его дети и счадкове его служити службою военною, часу войны, такъ, якъ и передъ тымъ служывали предкомъ нашымъ; а людемъ его Клецкимъ въ ловы ходити и подводы давати и замокъ оправляти водле давного обычая, и на сторожу ку замку ходити и розрубь платити; а ему самому съ тыхъ именеи въ ловы нашы ездити, какъ того часъ. А што ся дотычеть зверу у его именью, то люди его мають осочыти и дати ведомо на замокъ старосте нашому, а не маеть онъ самъ, а ни люди его у его именьи зверу ловити до тыхъ часовъ, нижли староста нашъ ловити у его именьи прынамней разъ у году; и тежъ духовъ рыбныхъ не маеть довити, оли на замокъ нашъ маеть ведомо дати. А на твердость того казали есмо печать нашу прывесити къ сему нашому листу. Пры томъ были: велебный отецъ князь Лаврынъ, бискупъ Каменецкій, а вельможный Людовикъ, канцлеръ нашъ, а Миколай Вольскій, охмистръ нашъ, а Копоть маршалокъ и цисаръ короля его милости. Писанъ у Кракове. Подъ леты Божого Нароженъя 1524 году, месеца Марта 7 денъ, цндиктъ 12.