village Kozyry

2017-01-25 Уладзімір Гваздзецкі

ВЁСКА КАЗЫРЫ
У далёкія часы вёска Казыры мела іншую назву -- Казаране. Гэта таму, што зямельны надзел тут меў дзяржаўны баярын Казарын. Магчыма ён паходзіў з тых татар Тахтамыша, якіх на землях лагойшчыны ў 1391 годзе пасяліў вялікі князь Вітаўт.
Вось, што можна прачытаць у кнізе "Памяць" Лагойскага раёна:
"Паводле "Попісу войска ВКЛ" у 1528 г. , у якім вызначаўся памер поштаў, якія павінны былі выстаўляць са сваіх вотчын паны і князі, а таксама быў паіменны пералік баяр-шляхты па кожнаму дзяржаўнаму маёнтку. Да двара Айна Менскага павета адносіліся 12 дзяржаўных баяр, якія ў залежнасці ад колькасці сялян-подданых павінны былі адпраўляць у войска па аднаму коннаму воіну (звычайна кагосьці з членаў сваёй сям'і ці слугу) з кожных 8 сялянскіх служб (як правіла, служба была ў карыстанні адной, часцей дзвюх, а часам і трох роднасных сямей). Каліж баярын меў меней за 8 служб ці не меў іх увогуле, ён адзін павінен быў з'явіцца ў войска.
З "Попісу" вынікае, што самыя буйныя надзелы ў Айненскім маёнтку мелі: удава нейкага Касцюшкі, Міхайла Плюскаў і Шырай, якія акрамя сябе, ставілі па 2 коннікі. Па аднаму каню выстаўлялі: Звярына, Іван Жылянін, Казарын, а таксама Міхна і Андрэй Песляковічы -- сыны памерлага раней баярына Васіля Песляковіча, якія падзялілі паміж сабой яго надзел.. . "
Зразумела, што каля 500 гадоў назад свой надзел баярын Казарын атрымаў не на пустым месцы, а тут людзі жылі ўжо даўно. Нямнога на поўдзень ад вёскі і будзе гара, якая на некатарых картах абазначана, як вышыня 268,3. Вось тут і з'явілася першае пасяленне 2700 гадоў назад. Пазней, а гэта было 1200 гадоў назад, людзі спусціліся з узвышшаў у нізіны таму, што стала значна халадней ды вецер быў больш моцны.