village Zvarinichi

2013-02-21 Уладзімір Гваздзецкі

Вёска Звярынічы знаходзіцца ў двух кіламетрах ад вёскі Гайна, уніз па цячэнню ракі Гайна. Пасяленне тут з' явілась прыблізна ў 15 стагоддзі. Назву вёска атрымала ад прозвішча айненскага баярына Звярыніча, які меў тут надзел. У ,,Попісе войска,, , складзеным у 1567 г. , указаны сын баярына, Міхайла Звярыніч, які замест сябе ў войска адправіў свайго сына Яна. Да 1917 года людзі ў вёсцы жылі неблага, тут быў і свой вадзяны млын. Калі на нашы землі прыйшла ,, Красная Армія,, і на сваіх штыках прынесла ўладу Саветаў, то сярод насельніцства многія былі незадаволены такой акупацыяй. "Прывіваць" насельніцству любоў да ўлады Саветаў краснаармейцам дапамагаў карны атрад кітайцаў, які нейкі час стаяў у Звярынічах. Потым адна жанчына нарадзіла дзяўчынку ад кітайца. Яшчэ ў другой палове 50-х гадоў у вёсках Звярынічы і Родзівічы дзяцей, каб тыя далёка ад дома не адыходзілі, то палохалі, што іх украдуць кітайцы. Пажылыя людзі ў тыя гады яшчэ добра памяталі зверствы карнікаў. Калі хто з дзяцей прасіў расказаць пра кітайцаў, то тады чулі, што гэта былі звяры ў чалавечым абліччы, якія лаўкай людзям кішкі выціскалі. Вось так бальшавікі замацоўвалі Савецкую ўладу на Лагойшчыне, вось чаму людзі гаварылі, што як прыйшлі ,,красныя,, , то знікла надзея на будучыню і знікла ўпэўненасць у заўтрашнім дні.